O colexio maior máis antigo de España realiza o Camiño de Santiago por quinta vez

fai 11 anos

Un grupo de universitarios residentes no Real Colegio Mayor de San Bartolomé ySantiago, da Universidade de Granada, acompañados de familiares e persoal desa entidade chegaron a Compostela tras a peregrinación bianual que realiza a entidade

A alcaldesa en funcións recibiu a delegación andaluza

O Real Colegio Mayor de San Bartolomé y Santiago, o máis antigo de España, visitou onte o Concello compostelán tras facer parte da ruta xacobea, unha actividade que realizaron por quinta vez desde que a puxeron en marcha hai 12 anos. De feito, na fachada da súa sede, un edificio do século XVI, colocouse un azulexo coa frecha e a inscrición do Camiño de Santiago.

Os 14 colexiais arrincaran a súa andaina fai unha semana en Vilafranca do Bierzo e chegaron a Compostela o luns. A concelleira Reyes Leis deulles a noraboa á expedición por ter completado o Camiño e polo seu "labor como embaixadores do mesmo en Granada". Desexoulle aos estudantes unha feliz estancia na cidade e amosou o "orgullo" e o "asombro" que lle segue producindo "a cantidade de persoas que cada día chegan á nosa cidade".

Os colexiais acudiron ao Concello coas becas azuis que teñen como distintivo. No seu nome falou o director do Colexio, José Luis Pérez-Serrabona, quen deu as grazas polo recibimento. Recordou que o Colexio Maior de San Bartolomé e Santiago da Universidade de Granada é o máis antigo de España aberto actualmente", e expresou o desexo de repetir a experiencia de realizar o Camiño.