Xuño foi o mes da historia co maior número de pernoctacións internacionais en Santiago

fai 10 anos

Santiago continúa crecendo como destino turístico internacional. Segundo os datos do INE, no mes de xuño alcanzouse o maior número de pernoctacións internacionais nun só mes da historia da cidade, con 65.389.

O anterior récord producírase en setembro do ano 2012, con 64.193. O terceiro mes remóntase a setembro do ano 2010, cando foron 62.207. O dato é importante non só pola cifra alcanzada senón porque se produce no mes de xuño, cando dende 2009 o mes do ano con maior número de pernoctacións internacionais da cidade é setembro.

A cifra deste mes de xuño supón un crecemento do 14,6 % respecto das 57.036 do mesmo mes de 2012. Así, no primeiro semestre do ano chégase xa ás 195.553 pernoctacións internacionais, que supoñen un crecemento do 11,2 % respecto do mesmo período do ano anterior. Trátase tamén do mellor primeiro semestre da historia da cidade en pernoctacións internacionais.

Turismo nacional

O turismo español alcanzou ás 51.470 pernoctacións en xuño, un descenso do 8,6 % respecto a xuño de 2012. Non obstante, a subida do turismo internacional en xuño fixo que en termos globais aumentase o número de persoas que fixeron noite en Compostela, xa que sumando domésticas e foráneas chegaron a 116.859, un 3,1 % máis que no mesmo mes do ano pasado, cando houbo 113.350.

No primeiro semestre o turismo español acumula 277.730 pernoctacións, un 2,3 % menos que no mesmo período do ano pasado. Pero tamén neste tempo o crecemento do turismo internacional fixo que se alcanzasen mellores datos que en 2012. Ata xuño a cidade rexistrou un total de 473.283 pernoctacións, o que supón un aumento dun 2,8 %. O turismo internacional representou neste período por primeira vez na historia máis do 40 % do turismo da cidade.