O Xacobeo resalta o labor das asociacións de peregrinos en prol da conservación da cultura e os valores do Camiño

fai 11 anos

A Asociación Galega de Amigos do Camiño de Santiago celebrou en Sobrado dos Monxes o seu vixésimo aniversario cunhas xornadas que incluíu conferencias, visitas guiadas, un concerto, unha mostra fotográfica e un percorrido por un tramo do Camiño Norte.

A Asociación Galega de Amigos do Camiño de Santiago foi fundada no mosteiro de Sobrado dos Monxes en 1992. Esta fin de semana, dúas décadas despois, os integrantes desta asociación e diversos expertos e interesados na cultura xacobea reuníronse de novo alí para conmemorar o aniversario desta organización, decisiva na recuperación, sinalización e difusión dos itinerarios a Santiago.

Entre os actos de celebración destacan a inauguración da mostra fotográfica XX Aniversario AGACS: 20 anos facendo Camiño Xuntos; o concerto A música no Camiño de Santiago do grupo Resonet ou a visita guiada ao mosteiro.

Tamén varios relatorios como o impartido polo xerente do Xacobeo, José Paz, no que resaltou o importante labor das Asociacións de Amigos do Camiño de Santiago a prol da conservación da Ruta, así como o traballo altruísta dos integrantes das mesmas. “A colaboración das asociacións coa Xunta de Galicia ten sido decisiva para a recuperación, sinalización e difusión de itinerarios hoxe tan seguidos e recoñecidos a nivel internacional como o Camiño Portugués, tanto en Galicia como en Portugal; o Camiño Fisterra-Muxía ou o Camiño do Sueste, entre outros”, destacou Paz Gestoso.

Así mesmo, o xerente resaltou a labor dos entes asociaciativos para a conservación do trazado físico pero tamén para a conservación dos valores inmateriais das rutas, como a hospitalidade, a solidariedade e o sentido histórico. Tamén incidiu no seu relatorio en que a Asociación Galega de Amigos do Camiño de Santiago é unha das Asociacións máis diversas, máis plurais e internacionais que existen arredor do Camiño.