Hostelería Compostela asina un convenio para potenciar a Ruta Xacobea do Mar de Arousa e Ulla

fai 11 anos

O presidente da sección de hospedaxe de Hostelería Compostela, José Manuel Otero, asina hoxe un convenio de colaboración coa Fundación Ruta Xacobea do Mar de Arousa e Ulla. 

Barcos facendo a Ruta Xacobea do Mar de Arousa e Ulla

O obxectivo deste convenio, que será asinado na Cámara de Comercio de Santiago, é potenciar o camiño marítimo fluvial da ruta xacobea do mar de Arousa e Ulla. O acordo permitirá poñer a disposición do turista a riqueza do legado histórico, patrimonial, paisaxístico, medioambiental e gastronómico que atesoura a Ría de Arousa e o río Ulla ata Santiago.

Ao convenio sumaranse, ademais, a Cámara de Comercio, a Asociación de Cámaras dos Camiños Xacobeos e Santiago Centro Área Comercial.

Este proxecto pretende aproveitar a tradicional e histórica vinculación entre Santiago e Padrón, ofrecendo aos peregrinos, turistas e visitantes un atractivo máis de ida e volta coa visita ao único Via Crucis marítimo-fluvial do mundo e ao pedrón, no que, segundo a tradición se amarrou a barca que trasladaba os restos do Apóstolo Santiago.