Rúa da Fonte dos Concheiros

Rúa da Fonte dos Concheiros

Esta rúa debe o seu nome á existencia dunha fonte na que bebían os peregrinos (en galego, popularmente, 'concheiros', portadores de conchas). Está situada na entrada do Camiño Francés na cidade actual.

Antes de entrar na cidade

Ao chegar a esta rúa, ata fai unhas décadas un simple camiño despexado, os peregrinos eran observados a distancia achegándose á cidade. “Chegan os concheiros” –“Chegan os peregrinos”– anunciaban en galego os composteláns, que aproveitarían tamén para ofrecerlles conchas e outros produtos a pé de vía antes de entrar na zona urbana.

A auga e a concha

A fonte orixinal dos peregrinos desapareceu, pero a actual Rúa da Fonte dos Concheiros aporta un dobre significado xacobeo. Recorda o vitais que eran as fontes para os peregrinos –a auga era o sustento máis valorado do Camiño– e a relevancia case sagrada que outorgaban á concha de vieira, símbolo xacobeo esencial sempre visible na vestimenta destes camiñantes, de aí o modo en que os citaban os composteláns.
O nome desta rúa tamén alude a outra confluencia: a concha era moi útil para beber a auga coa que acougar a sede e, ao mesmo tempo, considerouse, quizais case desde o inicio da peregrinación, símbolo de fertilidade espiritual e das boas obras que o Camiño representaba.